ዛንታ ኣሕመድ – ግድነት ዝሕለፍ መስገደል

“እዞም ኣብ ዓባይ ብሪጣንያ ዝውለዱ ምናልባት እዚ ኣይርድኦምን ይኸውን፤ ግና ንሕና ነዚ ጉዕዞ ክንጅምሮ እንከሎና እንታይ ከም ዝገጥመና ንፈልጥ ኔርና ኢና” ይብል ኣሕመድ፡፡ “ኣብቲ ምድረበዳን ባሕርን ከም እንመውት ንፈልጥ ኔርና፡፡ ግና እንታይ ምርጫ ኸ ኔሩና፡፡” ይብል ዝሓሸ ህይወት ንምንዳይ ካብ ኤርትራ ድሕሪ ምስንባቱን ዝሓለፎ ኣዝዩ ሓደገኛ መንገዲ እናዘከረ፡፡ ኣሕመድ ብ 2014 እዩ ካብ ኤርትራ ወጺኡ፡፡ ኣብ ሱዳን ዓሰርተ መዓልታት ድሕሪ ምቕማጥ ከኣ ናብቲ ኣዝዩ ሓደገኛ ጉዕዞ ሊብያ ኣተወ፡፡ ጉዕዞ ጅምር ምስ በለ ከኣዩ ኣሕመድ እቲ መጠን ጽንኩርነቱ ክርዳእ ዝኸኣለ፡፡

ኣሕመድ ምስ ካልአት ብምዃን ካብ መኪና ወሪዶም ንትሽዓተ መዓልታት ብዘይ እኹል ማይን መግብን ኣብቲ ምድረበዳ ሊብያ ተደርብዮም፡፡ ኣብቲ ግዜያት ሽዱሽተ ሰባት ብጽምእን ጥሜትን ክሞቱ ኣሕመድ ብዓይኑ ርእዩ፡፡

“እቲ ዝኸፍአ ነቶም ብጽምኢ ዝሞቱ ንጣብ ማይ ንክረኽቡ ክረድኦም ኣብ ዘይክእለሉ ኩነታት ምንባረይ እዩ” ብምባል ይዝክር፡፡

ውዒሉ ሓዲሩ እቶም ኣስገርቲ ካልኦት ሰገርቲ ጽዒኖመ ተመልሱ፡፡ ከም ተራ ኣቕሓ ተጨቓጪቖም ናብቲ ገያጽ ጎቦታት ጉዕዞኦም ቀጸሉ፡፡

ዛንታ ጉዕዞ ኣሕመድ ናብ ሊብያ ኣብዚ ስማዕ፡፡