Rohingyar í neyð

Rohingyar eru ríkisfangslaus múslimskur minnihluti í Myanmar. Nýjasti fólksflóttinn hófst þann 25. ágúst, 2017, þegar átök brutust út í Rakhine-héraði í Myanmar. Mikill meirihluti flóttafólks úr röðum Rohingya sem ná til Bangladesh eru konur og börn, þar með talið ungabörn. Margir aðrir eru aldrað fólk sem þarfnast aðstoðar og verndar.

Yfir 33.000 manns bjuggu þegar í flóttamannabúðunum í Kutupalong og Nayapara í Bangladesh áður en þessi straumur Rohingya hófst.. Búðunum var komið á fót  upp úr tíunda áratug síðustu aldar, og  núna hefur íbúafjöldi búðanna hækkað upp í um það bil 77.000, sem er langt umfram getu búðanna, sem leiðir til þess að margir nýkomnir Rohingya-flóttamenn þurfa að búa hjá öðrum flóttamannafjölskyldum eða gista í skólum búðana, samkomuhúsum og öðrum byggingum.

„Þeir brenndu húsið okkar og hröktu okkur á brott með skotum. Við gengum í þrjá daga í gegnum frumskóginn.“

–Mohammed, sem flúði til Bangladesh með sjö manna fjölskyldu sína, þar með talið ungbarn sem fæddist á leiðinni

Mikill meirihluti nýkominna flóttamanna búa núna utan búðanna, í bráðabirgðahúsnæði og tímabundnum skýlum, sem eru oft ekkert meira en segldúkur sem er strengdur yfir bambusstaura. Innviðir og þjónusta ráða ekki við fjöldann sem streymir að. Fleiri flóttamenn halda áfram að koma í búðirnar í afar slæmu ásigkomulagi. Við vinnum með stjórnvöldum í Bangladesh og öðrum yfirvöldum að því að finna hentug svæði til að koma þeim fyrir.

Eftir því sem fleiri flóttamenn koma, er bráð þörf á neyðarskýlum og landi undir þau, teppum og annari aðstoð. Til að draga úr hættu á sjúkdómum sem berast með vatni og lofti þarf flóttafólk og flóttamannabúðir á svæðinu aukinn aðgang að hreinu vatni, heilsugæslu eins fljótt og hægt er. Barnshafandi konur, ungbörn og eldra fólk eru í sérstakri hættu.

Hvað gerir flóttamannaráð SÞ til að hjálpa?

 Flóttamannaráð SÞ leiðir neyðarviðbrögð í búðunum tveimur, Kutupalong og Nayapara, þar sem starfsfólk veitir lífsnauðsynlega aðstoð og vernd til flóttamanna úr röðum Rohingya, í nánu samstarfi við aðra samstarfsaðila og yfirvöld.

Við byggjum ýmiskonar skýli og/eða aðgang að byggingum þar sem þau eru tiltæk, allt frá plastdúkum til tímabundinna bambuskofa til almenningsbygginga, eins og skóla sem eru notaðir sem tímabundin skýli.

Við dreifum einnig teppum, eldhúsáhöldum, vatnsbrúsum, luktum, svefnmottum og moskítónetum. Fyrstu tveir flutningar á neyðargögnum flóttamannaráðs SÞ sem innihéldu 3.500 vörur og 1.700 fjölskyldutjöld komu til Dhaka þann 13. september 2017 – nóg til að mæta þörfum 25.000 manns. Verið er að skipuleggja frekari flutninga neyðargagna á svæðið.

Við höldum áfram að bera kennsl á þá sem eru viðkvæmastir í hópi nýkominna flóttamanna, eins og fylgdarlaus börn, barnshafandi konur, aldraðir og fatlaðir og veita þeim þann stuðning sem þau þarfnast. Starfólk okkar vinnur að því að koma á fót barnvænum svæðum og til að koma í veg fyrir kynferðislegt og kynbundið ofbeldi.

01/11/2017