Dìth thaighean-beaga na thrioblaid san Eilean Sgitheanach
![portree](https://webarchive.archive.unhcr.org/20170623012339im_/https://ichef.bbci.co.uk/news/320/cpsprodpb/0581/production/_96590410_portreesunsetskye.jpg)
Tha dragh air nochdadh san Eilean Sgitheanach mun dhroch bhuaidh a tha gainnead thaighean-beaga a' dèanamh air an sgìre.
Tha mì-thoileachas air a bhith ann bho dhùin Comhairle na Gàidhealtachd grunn ghoireasan thar nam bliadhnaichean, ann an oidhirp airgead a shàbhaladh.
Tha cuid ag ràdh, ge-tà, leis gu bheil an àireamh luchd-turais a' sìor èirigh, gu bheil sin a' fàgail daoine ann an èiginn chun na h-ìre agus gu bheil feadhainn a' crùbadh air cùl charbadan is air cliathaich thogalaichean leis nach eil àite eile ann dhaibh.
Obair-càraidh
A rèir Sheumais Dhòmhnallaich, a tha fuireach ann an Ùige, tha an trioblaid seo a' fàs nas bitheanta.
Thuirt e nach e coire an luchd-turais a th' ann agus e a' tuigsinn nan duiligheadasan a th' aca nuair a tha iad feumach air an taigh-bheag ann an cabhag.
Tha na taighean-beaga ann an Ùige air a bhith dùinte bho thoiseach na bliadhna seo, agus dh'aidich Comhairle na Gàidhealtachd gu bheil feum aca air càradh.
Thuirt iad gu bheil iad air prìs fhaighinn airson na h-obrach, ach nach eil fhios aca cuin a bhios na goireasan a' fosgladh a-rithist.
Tha trioblaidean ann am Port Rìgh cuideachd le dìth-ghoireasan shìos aig a' phort fhèin, a tha a' fàs nas trainge gach bliadhna - eadar iachtaichean is soithichean mòra.
Thuirt Myra NicLeòid, bho Urras Coimhearsnachd Phort Rìgh agus na Bràighe gun do rinn iad sgrùdadh air na bha ri cleachdadh nan taighean-beaga air Là nan Geamaichean an-uiridh agus bha faisg air 3,000 air an aon là.
Tha uallach oirre gu bheil àitean leithid An Stòrr agus Glumagan nan Sìthichean cuideachd a' fulang le mòran luchd-turais airson tadhal air na h-àitean seo.
Thuirt a' Chomhairle gu bheil seachd taighean-beaga aca san Eilean Sgitheanach, agus trì 'sgeamaichean cofhurtachd'.