Burma News International, 07 Dec 2016
ကညီဒီကလုာ်စၢဖှိၣ်ကရၢ (KNU) ထီဘိကမံးတံာ်ကရၢဖိ ပဒိၣ်စီၤလၣ်ထိစံးဘၣ် KIC တၢ်ကစီၣ်, "KNU ဒီးကညီကရူၢ်အဂၤခံဖု အိၣ်ဒီးတၢ်ခွဲးတၢ်ယာ်လၢ ကတီခိၣ်ရိၣ်မဲဒီကလုာ်ပတီၢ်ထံရူၢ်ကီၢ်သဲးတၢ်တဲလီၤ. ဘၣ်ဆၣ်ထံရူၢ်ကီၢ်သဲးတၢ်ဂ့ၢ် မ့ၢ်တၢ်ဂ့ၢ်လၢအဘၣ် ထွဲဒီးကညီဖိခဲလၢာ်အဃိ ပအၢၣ်လီၤဆၢတဲာ်သကိး လၢပကပာ်ဖှိၣ်ပသး လၢထံရူၢ်ကီၢ်သဲးတၢ်စံးကတိၤအပူၤ, ဒီးတမၤအီၤလၢပ ကစၢ်ဒၣ်၀ဲတဖုလီၤဆီဘၣ်န့ၣ်လီၤ." DKBA ဒီး KNU/KNLA-PC ခံဖုလၢာ်လီၤဖးလၢ KNU ဖဲ ၁၉၉၄ ဒီး ၂၀၀၇ နံၣ်န့ၣ်လီၤ. အ၀ဲသ့ၣ်သၢဖုလၢာ် ဆဲးစုမုၢ်ကျၢၢ်လၢတၢ်ပတုာ်တၢ်ဒုးတၢ်ခးအ တၢ်အၢၣ်လီၤ NCA လၢ ၂၀၁၅ ဘၣ်ဆၣ်, အၢၣ်လီၤတူၢ်လိာ်သကိး ၀ဲလၢအဆၢကတီၢ်န့ၣ်လံၤလံၤ လၢအကပိာ်ထွဲ KNU ထံ ရူၢ်ကီၢ်သဲးအတၢ်တီခိၣ်ရိၣ်မဲအဂ့ၢ်န့ၣ်လီၤ. DKBA သုးရိၣ်မဲခိၣ်ခံဂၤတဂၤ စီၤစတံလ်စံးဘၣ် KIC တၢ်က စီၣ်လၢ, "ဘၣ်ဃးထံရူၢ်ကီၢ်သဲးအတၢ်ဂ့ၢ်, KNU မ့ၢ်ပကရၢမိၢ်ပှၢ်အ ဃိဒီးပဒိးသန့ၤပသးလၢအီၤ ဒီးလူၤပိာ်ထွဲအတၢ်တီခိၣ်ရိၣ်မဲ န့ၣ်လီၤ. တဘျီပမ့ၢ်ဒၣ် KNU လီၤ. KNU တၢ်ထံၣ်မ့ၢ်ပတၢ် ထံၣ်ဒီးပ တၢ်ထံၣ်မ့ၢ် KNU တၢ်ထံၣ်လီၤ." ဒီကလုာ်ပတီၢ်ထံရူၢ်ကီၢ်သဲးတၢ်တဲ မ့ၢ်တၢ်မၤအတၢ်ရဲၣ်တၢ်ကျဲၤတခါ လၢတၢ်ဒုးအိၣ်ထီၣ်အီၤလၢ NCA တၢ်ဆီလီၤပာ်လီၤအဖီလာ် လီၤ. တၢ်ဆှၢနုာ်ဒီးတၢ်ဟ့ၣ်ကူၣ်ဟ့ၣ်ဖး လၢအဟဲထီၣ်လၢထံရူၢ်ကီၢ်သဲးတၢ်တဲသကိးအပူၤတဖၣ် တၢ်ကဆှၢထီၣ်ဆူကီၢ်စၢဖှိၣ် တၢ် မုာ်တၢ်ခုၣ်တၢ်အိၣ်ဖှိၣ်ဖးဒိၣ် ခီဖျိကမံးတံာ်မၤတၢ်လၢအဘၣ်ထွဲတဖၣ်လီၤ. ဒ် KNU တၢ်ကစီၣ်စံး၀ဲအသိး, လၢထံရူၢ်ကီၢ်သဲးအတၢ်အိၣ်ဖှိၣ် တၢ်ကစံးကတိၤသကိး၀ဲ ထံရူၢ်ကီၢ်သဲးတၢ်ဂ့ၢ်, ပှၤဂ့ၢ်၀ီတၢ်ဂ့ၢ်, မုၢ် ကျိၤ၀ဲၤကွာ်, တၢ်ဘံၣ်တၢ်ဘၢ, ဒီးဟီၣ်ခိၣ်ကပံာ်ဒီးခိၣ်ဃၢၤန့ဆၢၣ်တၢ်ဂ့ၢ်သ့ၣ်တဖၣ်, ဒီးတၢ်အိၣ်ဖှိၣ်တၢ်ကမၤအီၤဖဲ ၀့ၢ်တကူၣ်ဒီး၀့ၢ် ဖၣ်အၣ်, ဒီးဒီကလုာ်ပတီၢ်ထံရူၢ်ကီၢ်သဲးအတၢ်တဲ တၢ်အိၣ်ဖှိၣ်အလီၢ်ခံကတၢၢ် တၢ်ကမၤအီၤဖဲလ့၀ါ (ကီၢ်ဃံလၤ) အဂ့ၢ်န့ၣ်လီၤ. ကညီထံရူၢ်ကီၢ်သဲးပၣ်တံၣ် ဒီးပှၤဂ့ၢ်၀ီကရၢတဖၣ် ကမၤဒံးတၢ်အိၣ်ဖှိၣ်အဂၤတခါ လၢကတၢၣ်ပီၣ်သကိး ဒီကလုာ်ပတီၢ်ထံရူၢ်ကီၢ် သဲးတၢ်တဲသကိးတၢ်အိၣ်ဖှိၣ်အဂ့ၢ် ဖဲ၀့ၢ်ဖၣ်အၣ် လါဒံၣ်စ့ဘၢၣ်အခိၣ်တိတနွံန့ၣ်လီၤ.